काठमाडौं– काठमाडौं महानगरपालिकाले दिनहुँजसो कोभिड–१९ संक्रमितको संख्या ह्वात्तै बढेपछि बढी भीडभाड हुने स्थानमा परीक्षणलाई तीव्र बनाएको छ ।
कोभिड संक्रमण अवस्था पहिचान गरेर महामारी नियन्त्रण गर्न महानगर र इपिडिमियोलोजी तथा रोग नियन्त्रण महाशाखाले संयुक्त रूपमा एन्टिजेन परीक्षण थालेका हुन् ।
परीक्षणका क्रममा मंगलबार कालीमाटी तरकारी बजारमा ४०२ जनामा एन्टिजेन परीक्षणमा गरिएकामा १२ जनामा पोजिटिभ देखिएको महानगरले जनाएको छ । बुधबार टुकुचा तरकारी बजारमा परीक्षण गरिनेछ ।
स्वास्थ्य मन्त्रालय र सिसिएमसीले पहिचान गरेका उच्च संक्रमणको सम्भावना रहेका स्थानमा परीक्षण सुरु गरिएको हो । यस किसिमको परीक्षण १० हजार जनामा गर्ने लक्ष्य छ ।
महानगरका स्वास्थ्य महाशाखा प्रमुख हरि कुँवरले भने, ‘परीक्षणबाट आएको नतिजाले लक्षणसहितका बिरामीलाई अस्पताल पठाउन र लक्षण नभएकालाई होम आइसोलेसनमा बस्न तथा निगरानी गर्न सहज हुनेछ ।’
उनका अनुसार महानगरको सहकार्यमा धेरै संक्रमित भएका असन, डिल्लीबजार न्युरोड, बालुवाटार र कोटेश्वरमा परीक्षण गरिनेछ भने भक्तपुरको भक्तपुर दरबार स्क्वायर, ललितपुरको पाटन दरबार स्क्वायरलगायत स्थानमा सम्बन्धित स्थानीय तहको सहकार्यमा एन्टिजेन परीक्षण हुनेछ ।
महानगरले कोरोनाका बिरामी बढेसँगै पिसिआर विधिबाट पनि परीक्षणलाई तीव्र बनाएको छ । गत शनिबारसम्म स्वाब संकलनका लागि ५ वटा केन्द्र बनाएर काम गरिरहेको महानगरले हरेक दिन संक्रमितको संख्या बढ्दै गएकाले आइतबारदेखि १६ वटा स्थल तोकेरै परीक्षणलाई तीव्र बनाएको छ ।
महानगरका ३२ वडाबाट मात्रै अहिले हरेक दिन ६०० जनाको परीक्षण हुने गरेको र परीक्षण गरिएकामध्ये ४२० जनामा पुष्टि हुने गरेको जनस्वास्थ्य महाशाखाले जनाएको छ ।
महानगरका ल्याब टेक्निसियन राधिका कुइँकेलका अनुसार परीक्षणका लागि आवश्यकताअनुरूप टोली तयारी अवस्थामा छ । ‘कोरोनाको शंका देखिएका र वडाले खटाएअनुसार अहिले परीक्षणको कामलाई व्यापक बनाइएको छ’, कुइँकेलले भनिन् ।
परीक्षणका क्रममा समस्या बढी भएका बिरामीका लागि एम्बुलेन्समा राखी अस्पतालसम्म ल्याउने–लैजाने व्यवस्थासम्म महानगरले गर्दै आएको छ ।
यसका लागि नागरिकले पैसा तिर्नुपर्दैन । कोरोना पोजिटिभ भएका बिरामीका लागि एम्बुलेन्ससँग महानगरले २ साताअघि नै सम्झौता गरिसकेको छ ।
उक्त सेवा महानगरका २३ वडामध्ये ७ स्थानबाट नागरिकले प्राप्त गर्न सक्नेछन् । कोरोनाका बिरामीले मात्रै नभई अन्य दीर्घ रोग भएका कसैलाई अस्पतालसम्म आउजाउ गर्नुपरे पनि महानगरले निःशुल्क एम्बुलेन्सको व्यवस्था गरेको छ ।
त्यसका लागि आवश्यक पर्ने जोकोहीले ११८० कामपाको हटलाइन नम्बरमा सम्पर्क गर्नुपर्ने छ । हाल महानगरमा ११ हजार ६३१ कोरोनाका सक्रिय संक्रमित छन् ।