कात्तिक १०, २०७७
काठमाडौं- आज नेपालीहरुको महान चाड विजयादशमीमा मान्यजनको हातबाट नवदुर्गाको प्रसादका रुपमा शुभ साइतको प्रतीक रातो टीका र समृद्धिको प्रतीक जमरा लगाएर मनाइँदैछ ।
आज देवी विसर्जनको साइत बिहान १०ः११ बजे र टीकाप्रसाद ग्रहण गर्ने उत्तम साइत १०ः१९ बजे रहेको नेपाल पञ्चांग निर्णायक समितिका अध्यक्ष प्रा. डा. रामचन्द्र गौतमले जानकारी दिए ।
विजयादशमीका दिन जतिबेला पनि टिका लगाउन हुने तर साइतमै टीका लगाउँदा देवीको शक्ति प्राप्त हुने धार्मिक विश्वास छ ।
अधिकांश ठाउँमा कोजाग्रत पुर्णिमाको दिनसम्म टिका लगाउने चलन छ ।
सत्ययुगमा देवीले महिषासुर र त्रेता युगमा रामले असत्यको प्रतीक रावणमाथि आजकै दिन विजय प्राप्त गरेकाले त्यही समयदेखि विजयादशमी मनाउन शुरु गरिएको धार्मिक विश्वास छ ।
मान्यजनका हातबाट नवदुर्गा भवानीको टीका, जमरा तथा प्रसाद थापी यश, ऐश्वर्य वृद्धि, काम गर्ने क्षमतामा वृद्धि एवं दीर्घायु प्राप्त होस् भनी आशीर्वाद लिइन्छ ।
असत्यमाथि सत्य र आसुरीशक्तिमाथि दैवीशक्तिको विजयको प्रतीकका रुपमा मनाइने विजयादशमी बडादसैंकै सबैभन्दा महत्वपूर्ण दिन हो ।
टिका लगाउँदा मास्क अनिवार्य
जनस्वास्थ्य विज्ञहरुले कोरोना संक्रमणको जोखिम रहेकाले टीका लगाइदिने र टीका थाप्ने दुवै व्यक्तिले मास्क लगाउनुपर्ने बताएका छन् । साथै टिका थाप्न अन्यत्र नजान पनि विज्ञहरुले सुझाव दिएका छन् । उनीहरुले आ–आफ्नो घरमै बसेर दसैं मनाउन आग्रह गरेका हुन् ।
आजकै दिन मौर्यसम्राट् अशोकले शस्त्रास्त्र परित्याग गरेकाले बौद्धहरु शस्त्रपरित्याग दिवस मनाउँछन् ।
चैत ०६, २०८०
फागुन ३०, २०८०
फागुन २९, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
