काली उर्लिएपछि डुबानमा सेतीवेणी बजार

कालीगण्डकीमा पानीको सतह २८ वर्षयताकै उच्च बिन्दुमा 


  • change font
  • change font
  • change font

पर्वत– अविरल वर्षाका कारण विश्वकै ठूलो शालिग्राम शिला र यस क्षेत्रमा रहेको बजार डुबानमा परेको छ । पर्वत, स्याङ्जा र गुल्मीको सिमानामा पर्ने पर्वतको बिहादी गाउँपालिका वडा नम्बर ६ सेतीवेणीमा रहेको विश्वकै ठूलो शालिग्राम शिला र स्याङ्जातर्फको बजार डुबानमा परेको हो । 

 

कालीगण्डकीमा पानीको सतह २८ वर्षयताकै उच्च बिन्दुमा पुगेपछि शिला र बजार पूर्ण रूपमा डुबानमा परेको स्थानीय तिलक पराजुलीले जानकारी दिए ।

 

उनका अनुसार बिहान ४ बजेदेखि बजार क्षेत्र डुबानमा पर्न थालेपछि १० घर विस्थापित बनेका छन् । १० घरपरिवार र उनीहरूका पसलमा रहेका सामान सुरक्षित स्थानमा सारिएको उनले बताए । 

 

बजार र शिला डुबानमा परेसँगै उक्त स्थानका वासिन्दा त्रसित बनेका छन् । नदीको वहाब उर्लिएर बजार क्षेत्रमै आएपछि व्यवसायीले सुरक्षित स्थानमा सामान सार्न थालेका छन् । ‘पवित्र शालिग्राम शिला र शालिग्राम क्षेत्रका सत्तललगायत सबै संरचनासमेत डुबाएको छ’, पराजुलीले भने ।

 

बजारवासीलाई संरक्षणका लागि बनाइएको तटबन्ध र ग्याविनसमेत पानीले पुरिएपछि शिलामा दर्शन गर्न जाने पूर्वाधारमा पूर्ण क्षति पुगेको उनले बताए । पानीको बहाव ह्वात्तै बढेपछि स्थानीय रातभर जाग्राम बसेका थिए । कालीगण्डकी र सेती खोला दुवैको बहाव उच्च हुँदा जोखिम बढेको हो । 

 

मुलुककै सबैभन्दा ठूलो कालीगण्डकी ए जलविद्युत् आयोजनाको बाँधका कारण बाढी आउँदा पर्वत, स्याङ्जा र गुल्मीको सिमानामा पर्ने सेतीवेणी बजार डुबानको खतरामा पर्ने गरेको छ । सेतीवेणी बजारमा डुबानको खतरा बढेपछि पर्वतमा पर्ने बजार क्षेत्र र स्याङ्जातर्फको बजार क्षेत्रमा झन्डै २ सय व्यापारी तथा सर्वसाधारण समस्यामा परेका छन् । 

 

११ वर्षअघि कालीगण्डकी र सेतीखोला उर्लेर आउँदा ३ दर्जन घरपरिवार विस्थापित बनेका थिए । २१ असोज २०६६ मा बजार क्षेत्र नै डुबानमा परेको घटनाले सधँैभर त्रास थप्ने गरेको स्थानीय व्यवसायी विष्णु न्यौपानेले बताए । कालीगण्डकीमा पानीको सतह बढेपछि विद्युत् आयोजनाको बाँधका सबै ढोका खोल्न लगाइएको प्रमुख जिल्ला अधिकारी देवी पाण्डे खत्रीले जानकारी दिइन् ।

 

उनका अनुसार सुरक्षा निकायले स्थानीयलाई सुक्षित ठाउँमा राख्न प्रयास गरेको छ । स्थानीय प्रहरी चौकीका अनुसार सोमबार राती पानीको बहाव उच्च बढेपछि बजारसम्मै आइपुगेको थियो ।