कात्तिक २४, २०७७
खोटाङ - खोटाङको ऐँसेलुखर्क गाउँपालिकामा नियुक्त गरिएका गाउँ प्रहरी शान्ति, सुरक्षा एवं दैनिक कार्यसम्पादनका क्रममा सहयोगी देखिएका छन् ।
बजार व्यवस्थापन, यातायात सेवा व्यवस्थापन एवं कार्यालयसम्बन्धी काममा गाउँ प्रहरी सहयोगी बनेको ऐँसेलुखर्क गाउँपालिकाका अध्यक्ष विश्वनाथ निरौलाले बताए ।
गत वर्ष नियुक्त गरिएका गाउँ प्रहरीले हाल ऐँसेलुखर्क बजारमा सडक पेटीमा सामान राखेर बिक्री गर्न, निर्माण सामग्री राखेर आवागमनमा अवरोध पुर्याउनमा रोक लगाउने गरेका छन् । यस्तै, बजारमा हुने अनियमितता नियन्त्रण गर्दै बजारलाई अनुशासित राख्नका लागि गाउँ प्रहरीले माइकिङ गर्ने, सिट्ठी बजाउँदै हिँड्नेलगायतका महत्त्वपूर्ण भूमिका निर्वाह गरिरहेको गाउँपालिका अध्यक्ष निरौलाले बताए ।
गाउँ प्रहरीले गाउँपालिकाभित्र सञ्चालनमा रहेका सडकमा भएका सानातिना अवरोध हटाउने, सडकमा फसेका सवारी साधन निकाल्ने काम गर्दै आएका छन् । यस्तै, कार्यालयमा हुने भीडभाड नियन्त्रणमा समेत गाउँ प्रहरीलाई परिचालन गर्ने गरिएको छ ।
गाउँपालिका अध्यक्ष निरौलाले भने, ‘गाउँ प्रहरीलाई अफिसको काममा पनि लगाउने गरिएको छ । कार्यालयमा हुने भीडभाड नियन्त्रणमा समेत उनीहरूलाई नै खटाउने गरेका छौँ । अझ कोरोना भाइरसको संक्रमण फैलिरहेको अवस्थामा भीडभाड नियन्त्रण गर्न सहज भएको छ ।’
शान्ति, सुरक्षा एवं दैनिक कार्य सम्पादनका क्रममा परिचालन गर्ने गरी गाउँपालिकाले १४ फागुन २०७६ मा जिल्लामै पहिलोपल्ट तीन जना गाउँ प्रहरी भर्ना गरेको थियो । स्थानीय सरकार सञ्चालन ऐनमा व्यवस्था भएअनुसार गाउँ प्रहरीको व्यवस्था गरी शान्ति, सुव्यवस्था र अमनचयन कायम गर्दै नीति, नियमलाई प्रभावकारी कार्यान्यवन गर्नका लागि गाउँपालिकाले प्रहरी भर्ना गरेको हो ।
कालो टोपी, सेतो सर्ट, नीलो पाइन्ट र कम्मरमा कुखुरी भिरेका गाउँ प्रहरी हाल गाउँपालिकाले तोकेको ड्युटीमा खटिरहेका देखिन्छन् ।
ऐँसेलुखर्क बजारका सडक पेटीमा जथाभावी राखिएका बिक्रीका सामग्री हटाएर बजार व्यवस्थित गर्न, विद्यालय क्षेत्रमा सवारी साधनको गति सीमित गर्न, क्षमताभन्दा बढी लोड बोकेर गाउँपालिका प्रवेश गर्ने र बाहिरिने सवारी साधनलाई निगरानी गर्नेलगायतका प्रयोजनका लागि गाउँ प्रहरी भर्ना गरिएको गाउँपालिका अध्यक्ष निरौलाको भनाइ छ ।
गाउँपालिकामा पाँच हजार नागरिकका लागि एक जना गाउँ प्रहरीको व्यवस्था गर्नेगरी कार्यविधि ल्याइएको छ । कम्तीमा हरेक वडामा एक जना गाउँ प्रहरी राख्नेगरी गाउँपालिकाले गाउँ प्रहरी व्यवस्थापन कार्यविधि पारित गरिसकेको छ ।
फागुन २८, २०८०
फागुन २७, २०८०
फागुन २१, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
