मंसिर ११, २०७७
सागर न्यौपाने - स्याङ्जाको पुतलीबजार नगरपालिकाको वडा-१३ मा रहेको माझी बस्तीमा कुखुराका खोर निर्माण गरिदिएको छ । माछा मारेर गुजारा चलाउँदै आएका माझी समुदायको आयआर्जनमा सहयोग पुर्याउन नगरपालिकाले खोर निर्माण बनाइदिएको हो ।
नगरले कुखुराको खोरमा आवश्यक पर्ने औजार तथा कुखुराका चल्ला, दाना र औषधी व्यवस्था गरिदिएको स्थानीय उमामाया माझीले बताइन् । पुतलीबजारले माझी बस्तीका २४ घरधुरीमा ३० लाखको लगानी गरी २४ कुखुराका खोर, दुई घर र गोरेटो बाटो निर्माण गरिदिएको छ ।
यसले २४ घरधुरीका एक सय २५ माझी परिवार लाभान्वित भएका छन् । त्यसैगरी नगरले कुखुरालाई आवश्यक पर्ने दाना र औषधी पनि उपलब्ध गराएको छ । ‘बस्ती अवलोकनका क्रममा माझी समुदायको दयनीय अवस्था देखेर संघ सरकारसँग समन्वय गरी ३० लाख माझी बस्तीमा सहयोग गरेका हौं’, नगरप्रमुख सीमाकुमारी क्षेत्रीले भनिन् ।
माझी बस्तीको उत्थानका लागि नगरपालिकाले पनि सहयोग गर्दै आएको उनले जानकारी दिइन् ।
नगरपालिका कार्यालयबाट आर्थिक तथा प्राविधिक सहयोगपछि लोपान्मुख अवस्थामा रहेको माझी बस्तीको मुहारै फेरिएको छ । माझी बस्तीमा खरले छाएका पुराना घरलाई अहिले जस्तापाताले टल्काइएको छ ।
यो समुदायका स-साना बालक अध्ययनका लागि विद्यालय जाने गरे पनि वयस्क युवक-युवतीहरू र ज्येष्ठ नागरिक माछा मार्ने र गिटी-बालुवा बोक्ने काम गर्छन् ।
फागुन २८, २०८०
फागुन २७, २०८०
फागुन २१, २०८०
चैत १९, २०८०
चैत १९, २०८०
चैत २२, २०८०
चैत १८, २०८०
